Santacruzan

Siguradong kaliwa’t kanan ang Santacruzan o Flores de Mayo sa iba’t ibang panig ng bansa ngayong buwan. Talaga namang pinagkakagastusan ito mula sa damit at sapatos na isusuot hanggang sa gayak ng arkong gagamitin. Mapapa-wow ka na lang sa garbo ng mga hitsura’t disenyo.

Read Also: Pinoy Catholicism: Kultura at Pananampalataya

May mga Flores de Mayo na artista ang kasali kaya mas kaabang-abang para sa fans. Di alintana ang init masilayan lang ang mga iniidolo sa parada. Ginagamit din itong pagkakataon ng mga kilala at batikang fashion designer para ipasuot sa mga modelo ang mga ipinagmamalaki nilang obra gaya ng mga one-of-a-kind designer gown at barong Tagalog.

Hindi lang mga artista ang inaabangan. May mga pagkakataon kasing sina Lolo at Lola ang bida sa Santacruzan kaya lalong exciting. Famous quote ni San Agustin, ang patron namin sa bayan ng Tanza, Cavite, “If they can, why can’t I?” Kung kaya ng mga binata’t dalaga, di naman siyempre pahuhuli ang ating mga senior citizen. Sino nagsabing hindi sila game na rumampa sa parada?

Isa pa sa highlight ng mga Santacruzan ngayon ang pagsali ng mga bading at tomboy o ‘yong nasa LGBT (lesbian, gay, bisexual, transgender) community. Madalas nagiging venue na rin ito ng mga pa-contest tuwing fiesta na Miss Gay at That’s my Tomboy. Mamamangha ka sa kanila. Mas magaganda pa sa tunay na babae ang mga bading. Di hamak ding mas guwapo pa sa mga tunay na lalaki ang mga tomboy.

Read Also: “E Kasi Lalaki”: Palusot na Hindi na Dapat Lumusot

Talagang nag-evolve na ang pagdiriwang ng Flores de Mayo. Minsan nga, umaabot nang higit pa sa dalawampu ang Reyna Elena sa isang Santacruzan. Sa Bicol region, nagdarasal muna ng Holy Rosary bago simulan ang parada na karaniwang tuwing Miyerkules at Sabado sa buwan ng Mayo. Wala namang masama kung iba-iba ang paraan natin ng paggunita sa taunang tradisyon. Ang higit na importante, huwag sanang makalimutan ang diwa at tunay na kahulugan nito.

Isang Catholic festival ang Flowers of May o sa wikang Kastila, Flores de Mayo kung saan araw-araw inaalayan ng bulaklak si Birheng Maria bilang pagninilay at pagpupugay sa kanya sa buong buwan ng Mayo. Nagtatapos ito sa isang grand finale na kung tawagi’y Santacruzan o Holy Cross.

Nag-oorganisa ng Santacruzan ang iba’t ibang parokya at mga komunidad sa lahat ng sulok ng bansa upang gunitain ang paghahanap at pagkakatagpo nina Reyna Elena at ng kanyang anak na si Emperador Constantino ng Banal na Krus mula sa Jerusalem. Si Constantino ang nangunang gawing pambansang relihiyon ang Kristiyanismo, kaya lalo itong lumaganap noong mga unang panahon.

Read Also: “Babae Kasi”: Bakit Ito Mali

Pinaparangalan din ng Santacruzan ang mga bidang babae sa Banal na Kasulatan. Makikita sila sa Lumang Tipan: si Reyna Ester, Reyna Saba o Sheba, at si Infanta Judith. Kasama rin sina Veronica, Maria Magdalena, Maria Jacobe, at Maria Salome. Sa dulo ng prusisyon ng Santacruzan, makikita naman si Reyna Elena, kung minsa’y may Emperatriz pa.

Dahil dito, pinapaalala sa atin ng Santacruzan na malaki ang naiambag ng mga babae sa pagpapalago ng ating pananampalataya. Higit sa lahat, ang masigasig na paghahanap sa Diyos.

From TV news reporting, Julius Segovia finds love in the academe, teaching mass communications courses. He also continues his advocacy on entrepreneurship.

Leave a Reply