Kontra Alipunga

Uso na naman ang alipunga ngayong tag-ulan kung kailan madalas ang pagbaha. Ang alipunga o athlete’s foot sa Ingles ay fungal infection na kumakalat sa ilalim ng paa at balat sa pagitan ng mga daliri nito. Kadalasang nagkakaroon ng alipunga kapag pinapawisan ang paa na nakakulob sa sapatos. Prone din dito ang mga taong laging naglalakad na walang sapin sa paa lalo na ang mga lumulusong sa baha.

Read Also: Of Mens and Women: Busting Period Myths

Kadalasang sintomas ng alipunga ang pagkakaroon ng scaly at mapulang rash na nagsisimula sa pagitan ng mga daliri ng paa, at paghapdi at pangangati ng balat. Kung malala na ang alipunga, posibleng makaranas ng pag-crack, pananakit at pagdurugo sa paa. May iba ring klase ng alipunga na posibleng magdulot ng blisters.

Dahil dulot ito ng fungus, puwede itong kumalat sa kamay lalo na kapag kinamot ang apektadong paa at kakalat din sa iba pang bahagi ng katawan.

Para magamot ang alipunga, panatilihing malinis at tuyo ang mga paa – paraan ito para mapigilan ang pagdami ng fungus. OK kung gagamit din ng sandals kaysa pirming sapatos para mahanginan ang mga paa. Kung lulusong naman sa baha, ugaliing magsuot ng bota. Iwasan ding maglakad sa kalsada nang walang suot na tsinelas.

Puwede ring gumamit ng antifungal cream. Tuluy-tuloy itong ipahid sa apektadong bahagi ng paa hanggang sa gumaling. Karaniwang bubuno ng isang linggo bago mawala ang sintomas ng alipunga.

May mga mabisang home remedy rin naman na puwedeng subukan para hindi na magpabalik-balik ang alipunga sa paa.

Para mapatay ang fungi ng alipunga, pahiran ang paa ng pinitpit na bawang na may coconut oil. Ayon sa mga eksperto, kapwa may anti-bacterial components ang langis ng niyog at bawang. Kaya pag pinagsama, tiyak na doble ang lakas nitong labanan ang alipunga.

Read Also: What are the Benefits of Honey Water?

Effective ding pantanggal ng alipunga ang green tea na may pinulbong luyang dilaw o turmeric. May phytochemicals daw ang turmeric na kontra-maga. Ang green tea naman, may alkaloids na nakalilinis daw ng balat at nagpapabilis ng paggaling. Gawing panghugas daw ito oras na kumakati ang apektadong paa.

Puwede ring gumamit ng suka. I-dilute ang suka sa tubig – ihalo ang isang tasa ng suka sa tatlong tasang tubig. Ibabad ang apektadong paa rito sa loob ng sampung minute. Gawin ng isa o dalawang beses kada araw.

Sa totoo lang, hindi dapat ipagwalang-bahala ang alipunga. Dapat nating alagaan ang ating mga paa dahil isa ‘yan sa mga gamit na gamit na bahagi ng ating katawan.

From TV news reporting, Julius Segovia finds love in the academe, teaching mass communications courses. He also continues his advocacy on entrepreneurship.

Leave a Reply